" ياســـيدة "

" ياســـيدة "
إنتى ايه ؟
وإنتى ليه ؟
واشمعنى انتى ؟
اللى ساكنة الاوردة
وانتى اللى تيجي فى المنام
بتحلى شفرة حب بتوضح كلام
بكلام يخش الأفئدة
ياسيدة
قدام عيونك زغللت كل العيون
واتحولت كل المشاعر ناحيتك
واتفرغت ليكي الفنون
ترسم جمالك
توصفك
وتشوف حركتك والسكون
ما انت الوحيدة ف قلب كون
وانا إيش اكون ؟
وازاى كده ؟
قدام عيونى كل يوم متجددة
يا منجدة
قريت فى سفر المعجزات
غوصت فى قلب التاريخ
علشان أشوف كل اللى فات
واتصورك
واجيب كتير م الذكريات
واقول فتحت زمان ممالك
عديت بحور
ومشيت مسالك
وعانيت كتير
لقيتك إنتى المعجزة
وانتى اللى باقية ف قلبي انا
وإنتى الوحيدة المنقذة
وانتى اللى حضنك لمنى
وانتى اللى قلبك ضمنى
وانا كنت مجتاح معجزة
يا معجزة
لله شئون
بين كاف ونون
قادر يحل المشكلة
والقى جواب للأسئلة
واعرف أنا
وانتى ليه ؟
واشمعنى انتى .........

تقبلوا خالص تحياتى